2011/2012

Litið yfir 2011…
Það er öllum hollt að líta yfir farinn veg og skoða hvað hann/hún hefur gert vel og hvað má bæta. Ég ákvað síðustu áramót að strengja ekki áramótaheit en setti mér þrjú markmið:
„En nýja árið leggst vel í mig, ég hlakka svolítið til að ögra sjálfri mér, en svona eru markmiðin mín og svona mun ég einnig mæla árangurinn:
•    C25K klára allar vikurnar í fyrri hlutanum (árangurinn mælist fyrst og fremst í þoli)
•    Líkaminn fyrir lífið 12 vikur (ummálsmælingar fyrir, á meðan og eftir)
•    Mataræðið, nammidagur 1 dag í viku ( matardagbók)“
Nú er kominn tími á að fara yfir þessi markmið og hvernig gengið hefur að vinna að þeim. Ég ákvað því að lesa yfir gamla bloggið mitt og skoða færslurnar frá árinu….
Fyrsti janúar byrjar vel með förgrum fyrirheitum og markmið og gott ræktarár. 3. Janúar tiltekt og heima með börnum að óverdósa á hrökkbrauði. 8. Janúar var laugardagurinn og mín fór út í ísbúð að borða ís. Svo kemur mynd af öskrandi kalli 22. Apríl, mín búin að klúðra málunum greinilega og öskureið við sjálfa sig, 30. Júní alveg í öngum mínum yfir því að kílóin hafa hlaðist á mig aftur, set aftur fram fögur fyrirheit um að rækta líkamann að hausti. 2. September byrjuð að setja mér markmið fyrir árið og eitt af þeim er að hlaupa 10 km í Reykjarvíkumaraþoni 2012 (FOKK!!!). 12. September set ég fram markmið um að vera bjartsýn. 13. September ennþá engin ræktarstatus… 19. September skrifa ég um að halda í jákvæðni og gleði í bland við þyngdarpælingar. 11. Október  ennþá enginn ræktarstatus, bíddu er þetta ekki heilsublogg????
Hvað geri ég svo við 2012?
Spurning um að gera bara copy/paste á markmiðin og standa sig betur á árinu?

Úfff!!!

Mig vantar svo fleiri tíma í sólarhringinn, meiri sjálfsaga, meiri trú á sjálfa mig, meira sjálfstraust, meiri mótiveringu og svo framvegis. Einhvern veginn er ég alveg í molum núna. Ég er búin að vera hálf lasin og ómöguleg síðustu viku, byrjaði á hálsbólgu og svo fékk ég hósta og er búin að vera hóstandi, slöpp og drusluleg alveg síðan í síðustu viku. Lífið gaf mér samt enga sénsa en ég þurfti að mæta í skólann, vinnuna, vinna verkefni, lesa fyrir skólann, halda bekkjarafmæli, mæta á kóræfingu, undirbúa fjölskylduafmæli og halda fjölskylduafmæli, já í rauninni versta vikan til að veikjast svona…. sem betur fer fékk ég smá greiða í gær því einu verkefninu sem var að tæta mig upp var fresta þannig að ég gat andað mun léttar…. think God. Ég ákvað svo í morgun að ég væri ekki orðin nógu hress til að fara í vinnuna, er að sofa illa vegna hóstans þannig að ég var heima í dag og reyndi að hvíla mig vel. Ég þurfti hins vegar að skutla eldri skvísunni í fimleika og svo fara með henni á bekkjarkvöld. Síðan ætlaði ég að rumpa af smá lærdómi í kvöld en sat bara við tölvuna gjörsamlega galtóm og hugmyndalaus…  En jæja svona er lífið þessa dagana….   svo er meira, ég veit ekki hvort ég eigi að fara út í þær pælingar á opinberu bloggi, meira svona fyrir mig að pæla í með sjálfri mér. Heyrumst…

mánudagur….aftur!

Jæja ég kem góð undan helgi, borðaði ekki yfir mig af neinu! Í fyrsta sinn í langan tíma, ég hins vegar drakk smá áfengi en alls ekkert mikið þannig séð, smá sommersby og freyðivín. Borðaði pínulítið nammi og held að ég hafi bara staðið mig vel.

Í dag er ég fín, er ekki að kálast úr nammigræðgi, annars á ég oft dálítið erfitt á mánudögum, maður vill nefnilega halda áfram að sukka og sukka eftir helgarsukkið. En þrátt fyrir að ég sé fín núna þá er ekkert víst að staðan verði eins í kvöld, ég er alltaf verri á kvöldin, alltaf með svo mikla nartþörf en ég á melónu og ætla að kjamsa á henni ef ég verð dýrvitlaus alveg Annars þorði ég ekki á vigtina í dag, kannski á morgun. Síðast þegar ég fór var ég nefnilega búin að þyngjast um einhver 3 kg, eftir að hafa lést um 1. Ég veit að það er ekkert að marka svona, eitt upp og eitt niður og þannig, æj samt maður verður alltaf svo svekktur og fer að spá hvað maður gerði vitlaust og fer að brjóta sig niður, ég ætla að reyna að fara ekki í þann pakka. Ég er ekki í keppni heldur er ég að setja mér langtímamarkmið. Planið er að verða komin í kjörþyngd þegar ég útskrifast og það er eftir 3 ár sko!!! Ef ég er núna 60 kg yfir kjörþyngd (já 60 KG og já ég veit að það er HEIL manneskja!!!) þá eru þetta 20 kg á ári eða 1,6 kg á mánuði. Það bara hlýtur að vera gerlegt, fyrir hvern sem er! Þannig að kíló upp hér og þar á ekki að setja mig útaf laginu, stundum er ég með bjúg, stundum borðaði ég aðeins og mikið salt, stundum borðaði ég bara of mikið, þá er bara að taka á því eftir að talan á vigtinni hækkaði og þar með er það afgreitt. Ég ætla að halda í jákvæðnina og gleðina og reyna að njóta lífsins á meðan ég er í þessu ferli Ég er alveg viss um að smávægilegar breytingar verða til þess að mér tekst þetta, eitt lítið skref í einu er málið!

þriðjudagur

Í gær tók ég út kjúllabringur og ætlaði að elda eina í hádegismatinn… bringurnar voru súrar og ég þurfti að henda þeim. Ohhh ég þoli ekki þegar ég þarf að breyta matarplaninu mínu, það fer allt í kerfi (note to self: alltaf að hafa plan B!!), ég endaði á því að borða samloku með túnfissalati, gulrætur og blómkál. Svo eftir matinn fékk ég illt í magann, GREIT! Var illt í maganum allan gær dag.

Ég geri venjulega alltaf kvöldmataráætlun fyrir allan mánuðinn en núna hef ég ekki gert það fyrri september, það þýðir að á hverju kvöldi er sama tuggan ” hvað eigum við að hafa í matinn?”  “ég veit það ekki” “hvað langar ykkur í?” “ég veit það ekki”. Í gær fór ég með yngri stelpuna út í búð og hún fékk að velja, daman valdi plokkfisk, fínt! Ég alsæl með að sleppa billega frá eldamennskunni. Skelli plokkaranum á pönnuna og tilbúinn stuttu síðar. Svo er borða og plokkfiskurinn var ógeðslega vondur, geggjað! Allir fengu sér svo appelsínu hlunk í eftirmat, enda ekki skrítið eftir svona vondan kvöldmat.Mér var svo illt í mallakút fram eftir kvöldi…

Dagurinn í dag byrjaði vel, ég fékk mér cheerios með mjólk, nokkuð basic bara. Cheerios hentar mér vel því ég er afskaplega löt þegar kemur að morgunmat, þess vegna fannst mér ískápsgrautarnir hennar Ellu Helgu snilld! Ekkert að gera bara henda þessu í box kvöldið áður og svo borða morguninn eftir. Kannski ég geri einn svoleiðis í kvöld mmmm

Ég þurfti svo að fara út í bæ á fund og þurfti eiginlega að spjalla við manninn minn eftir fundinn þannig að við ákváðum að vera flott á því og fara í lunch. Við fórum á Ask en þar er alltaf hægt að finna eitthvað gott í gogginn, en jei magapínan kom aftur þegar ég var búin með salatið mitt, þannig að ég borðaði næstum ekkert af matnum mínum. Ennþá að drepast í maganum. Þurfti að koma við í Kringlunni á leiðinni heim og ég held að ég sé búin að prófa öll klósettin þar í dag. Geggjað, en dagurinn heldur áfram og nú þarf ég að skutla börnunum á fimleikaæfingar, spurning hvort að ég þurfi að verma setuna þar ? Vonandi ekki! En tilgangurinn með þessu rausi er ekkert endilega bara að vekja með ykkur viðbjóð á sjálfri mér heldur bara að spegúlera í þessu hvað geti valdið þessu, ég hef ekki verið að breyta neinu svosem, ekki að borða neitt nýtt eða taka neitt út. En ég held áfram að skrifa matardagbók og þá kannski finn ég út úr þessu   Bæææjjj

mánudagur

Jæja börnin komin í skólann, hafragrauturinn borðaður, sit hérna við tölvuna og spegúlera í komandi viku. Núna ætla ég að eiga góða viku. Heimilið er að verða komið í þokkalegt stand en það hefur gengið ferlega hægt að ganga frá eftir ferðalagið, og ennþá dót á borðstofuborðinu en þetta er allt að gerast hægt og rólega.

Markmið vikunnar er bjartsýni og jákvæðni. Jább, mér finnst ég þurfa að taka mig á þar og ætla að hafa það að markmiði vikunnar og ég held að það sé góð byrjun í þessu ferli mínu að breyttum og bættum lífsstíl.

þar til næst…

hello again…

Sumarfríið er búið! Ég veit ekki hversu margar plötur af súkkulaði ég át í fríinu en þær voru all margar. Ég kem þó vel undan fríi vegna þess að ég er einu kg léttari en áður en ég fór sem er bara fínt en ég finn samt að maginn á mér er útblásnari sem ég er ekki að fíla.

En fyrst að fríið er búið þá er um að gera að vinda sér í lífsstílinn… síðasta vika hefur einkennst af fríhafnarnammiáti en í dag ákvað ég að segja stopp og hætta áður en ég verð hnöttótt en þá kemur það…. fráhvörfin sko!

Klukkan er að verða tvö og ég er ennþá ekki búin að borða nammi í dag. Ég er gjörsamlega að missa mig í nammilöngun… ákvað að fá mér coke light til að fá mér smá eitthvað sætt en ég stari samt ennþá græðgislega á daimpokann fyrir framan mig… ætla ekki að snerta hann, kannski set ég hann inn í skáp ef hann heldur áfram að trufla mig svona   En er annars búin að vera ótrúlega stillt í dag, cheerios í morgunmat, nokkur vínber og ritzkex með osti í millimál (tékkaði á hitaeiningunum og ákvað að nokkur ritx myndu ekki gera neitt alvarlegt), borðaði svo kjúkling með grænmeti og 1 kartöflu í hádeginu…. þarf samt að fara að finna eitthvað til að narta í svo ég grípi ekki í sjúkkóið…

Annars er ég á fullu að skipuleggja markmiðin mín í huganum, ég er komin með eitt, 10K í næsta Reykjavíkurmaraþoni :):) Markmiðið er að klára…. uppfæri það kannski ef mér gengur vel í vetur að æfa mig. En fyrir rúmu ári ákvað ég að taka C25K og það gekk rosalega vel fyrstu vikurnar en síðan á viku 5 fór að halla undan fæti og það gekk ekki eins vel hjá mér, núna er ég ennþá þyngri en þá og þá verður þetta jafnvel enn erfiðara en þá þarf ég bara að vera enn þrjóskari

En já Markmið 1 er klárt:

Hlaupa 10 km í Reykjavíkurmaraþoni 2012

svo er bara að byrja að æfa sig…

hædíhó

Þetta blogg er nú meira fyrir mína innri útrás, veit ekki til þess að það lesi þetta nokkur en ég skrifa hérna amk til að koma höndum yfir hugsanir mínar. Það er margt að brjótast um í hausnum á mér, ég er algjörlega búin að setja sjálfa mig í þrítugasta sæti í vetur, skólinn tók mikið, vinnan slatta og síðan komu börnin, húsbandið og svo ég… ég hef ekki stigið fæti inn í ræktina svo mánuðum skiptir, ég hef ekki farið út að hlaupa í óratíma, ég hef ekki hugsað um hvað ég læt ofan í mig lengi. Það verður bara að viðurkennast að slík hegðun er ekki til góðs, kílóin hafa hrannast á mig aftur og ég stend í sömu sporum núna og þegar ég labbaði í fyrsta sinn á GSA fund. Þangað inn hef ég þó ekki hugsað mér að fara aftur, það blundar alltaf í mér, þetta var jú það sem virkaði fyrir mig í einhvern tíma, en ég fann það að ég átti ekki eftir að finna mig í því til lífsstíðar.

Næstu 7 vikur verð ég í sumarfríi og ég ætla að nota þær vikur til að hugsa mig um. Skipuleggja æfingaáætlun, ákveða hvernig ég ætla að vinna þetta í framhaldinu. Ég þarf líka að skipuleggja mig vel í vetur, skólann, vinnuna og heilsuna, allt þarf þetta sinn tíma. En núna ætla ég samt að njóta þess að vera í löngu og góðu fríi með húsbandinu og börnunum Ætla að vera virkari hér í haust.

jáhá…

þessi segir allt sem segja þarf um líðan mína varðandi heilsumálin eins og þau standa í dag….

laugardagur, nammidagur, ísdagur, tiltektardagur, lestrardagur, ræktardagur….

Nei kannski ekki þetta allt en sumt af þessu tilheyrir laugardeginum. Ég byrjaði daginn á því að sofa út, unaðslegt ég er búin að vera svo lafþreytt þessa vikuna að það er ekki venjulegt, skil ekkert í þessu, hef líka lítið farið í ræktina og fögru fyrirheitin um að vakna kl 5:30 til að mæta í ræktina verða að bíða fram í næstu viku. En nú held ég að flensuskíturinn eða votturinn af honum sé að rjátlast af mér og ég dreif mig í ræktina í hádeginu. Ég fór fyrst á brettið og ætlaði að hita upp fyrir lyftingarnar en gleymdi mér aðeins yfir einhverri bíómynd þannig að ég endaði á því að labba í 40 mínútur en það var ágætt, mér leið svo vel á meðan, ég fann alveg hvernig ræktarvellíðunartilfinningin hríslaðist um kroppinn Þegar blessuð myndin var búin (sem var btw ekkert spes svosem) lyfti ég lóðunum, ég lét mig hafa það að fara yfir á “naggasvæðið” (svæðið þar sem þeir vöðvastæltu stilla sér upp fyrir framan spegil og lyfta lóðum með grettu á andlitinu). Teygði síðan vel á og fór í langa góða sturtu. Fór svo heim og borðaði hádegismatinn í seinna laginu. Planið í dag er að kíkja í Rúmfatalagerinn og athuga hvort ég fái ekki ruslafötu fyrir eldra barnið og svo ætla ég að bjóða þeim upp á YOYO ís  og eflaust fá mér smá af honum sjálf

3. janúar 2011

í dag er ég heima með börnin, við erum svona að reyna að taka til eftir jólavertíðina, jólatréð var rifið niður áðan og nú fer stofan mín að ná réttri stærð aftur. Er nefnilega með hjúds jólatré, það er svakalegt alveg hvað það er eiginlega bara alltof stórt fyrir stofuna mína En kannski eignast ég einhvern tímann stærri stofu.

Ég vaknaði ógurlega seint, börnin mín gláptu á teiknimyndir fram eftir morgni á meðan ég svaf á mínu græna, sturtaði í mig einni skál af kornflex með nýmjólk.

í fyrstu tiltektarpásu var svo matarhlé þar sem ég hesthúsaði 6 hrökkbrauðsneiðum með kotasælu og gúrku, svolítið óverdós kannski?? En æ ég er eiginlega bara fegin á meðan ég borða ekki súkkulaðið i nammiskápnum eða snakkið sem liggur á eldhúsbekknum. Ég er nefnilega alveg húðlöt þegar kemur að mat þessa dagana og nenni engan veginn að búa til neitt gómsætt en nú þarf ég að fara að sparka mér í gang því að rútínan byrjar bara strax á morgun, jólafríið búið og það er bara vinna kl 8 í fyrramálið og skóli eftir hádegið og það þarf að fara í ræktina, lesa fyrir skólann, halda heimilinu sæmilegu, hafa til kvöldmat, þvo þvott…  *yfirlið* einn dag í einu…. muna það!!! Taka bara einn dag í einu! Ég á það til að verða svolítið dramatísk og á það líka til að hafa of mikið að gera.

Á eftir þarf ég að redda mér nokkrum skólabókum, kaupa pollagalla á yngra barnið og versla einhvern mat því hér eru allir skápar að verða tómir af skynsamlegum mat.